Meri Aankhon Ki Taraf Dekh Meri Baat Samajh

Meri Aankhon Ki Taraf Dekh Meri Baat Samajh 
Mujh Se Naraaz Na Ho Tu Mere Halaat Samajh 

Meri Khuwahish Hai Tere Marmaren Rukhsaron ko 
Main Har Ek Lamha Nigahon Mein Samaye Rakhon 
Teri Aankhen Meri Aankhon k Maqaabil hi Rahein 
Main Teri Maang Sitaron se Sajaye Rakhon 

Tujh Se Gham Le k Tujhe De Doon Khushi ki Daulat 
Tere Hoonton ko Jila Bakhshe Tabassum Tera 
Khoob-Soorat Ho Teri Tarah Meri koi Ghazal 
Mere Ash'aar ko Mil Jaaye Tarannum Tera 

Jane kiyon phir Mujhe Duniya ka Khayaal Aata Hai 
Jis Mein Farsooda Rawayat ki Zanjeren hain 
Jisam Aazaad Hain Hum Sab k Ba-Zaahir Lekin 
Qaid Mein Siskiyaan Leti Huwi Taqdiren Hain 

Tu Hai Masoom Na Samjhe Gi Zamaane ka Chalan 
Tujh ko Maloom Nahi Hain Yahaan Waalon ke Rawaaj 
Main Bataata Hoon Tujhe Mujh Se Dam-e-Aakhir tak 
Tujh Ko Milne Nahi De Ga ye Zamaana ye Samaaj 

Is Liye Mujh ko Bhula De Yahi Behtar Hoga 
Warna Tere Liye Andesha-e-Ruswaai Hai 
Ye Alag Baat Rahoon Ga Main Sukoon se Mahroom 
Main Ne Khud Apne Kiye Ki Ye Saza Paayi Hai

Comments