Labels

Wednesday, 8 November 2017

Na Miti Thi Na Miti Hai Na Mitegi URDU

Na Miti Thi Na Miti Hai Na Mite gi URDU
Chahne Walon Ke Honton Pe Rahegi URDU

Ye Zaban Wo Hai Jo Mahlon Mein Rahi Aan Ke Sath
Aur Mazdoor Ke Ghar Mein Bhi Rahi Shaan Ke Sath

ISHQ Ki Raah Ko Isne Kayi Raahi Bhi Diye
Sarhadon Ke Liye Jaanbaz Sipahi Bhi Diye

Jazba e Jung Ko Seenon Mein Jagaya Isne
Apne Bharat Ko Ghulami Se Chhraya Isne

Ye Zaban Jaise Usoolon Ki Zaban Lagti Hai
Aesi Dilkash Hai K Phoolon Ki Zaban Lagti Hai

Iske Nazdeek Na Hindu Na Musalman Koi
Jisne Apnaya Ise Pyar Se Uski Ye Hui

Ye Taassub Ke Andheron Ko Mita Deti Hai
Aandhiyon Mein Bhi Chiragh Apna Jala Deti Hai

Ja Ke Shaikh Ki Dahleez PaFan Ban Jaye
Poche Mandir Mein To Meera Ka Bhajan Ban Jaye

Ye To Hai Pyar Ki Pooja Ki Ebadat Ki Zaban
Ye To Hai Rooh Ki Dharkan Ki Mohabbat Ki Zaban

Is Zaban Ke Liye Seenon Mein Adawat Na Bharo
Ye Zaban Pyar Sikhati Hai Ise Pyar Karo

Is mein Hindi Ke Bhi Alfaz Hain Irani Bhi
Is mein Geeta Ke Bhi Alfaz Hain Quraani Bhi

Kon Kehta Hai Arab Se Ye Zaban Aayi Hai
Aur Is Desh Mein Gairon Ki Zaban Chhai Hai

Yahin Janmi Hai Yahin Isne Jawani Payi
Ganga Aur Jamna Ki Lahro Se Rawani Payi

Jis Tarah Bhi Rahe Isko To Yahin Rahna Hai
Hum ko URDU Ke Hareefon Se Yahi Kehna Hai

Apni Tahzeeb Ko Sansar Mein Ruswa Na Karo
Yani URDU Ko Mitane Ka Iradah Na Karo

Apni Pagri Ko Uchala Nahi Jata Logo
Ghar Se Beti Ko Nikala Nahi Jata Logo

No comments:

Post a Comment