Aa gayi yaad shaam dhalte hi

Aa gayi yaad shaam dhalte hi
Bujh gaya dil chiraaG jalte hi

Khul gaye shahr-e-gham ke darwaze

Ek zara si hawaa ke chalte hi

Kaun tha tu? K phir na dekha tujhe

MiT gaya khaab, aankh malte hi

Khauf aata hai apne hi ghar se

Maah-e-shab taab ke nikalte hi

Tu bhi jaise badal sa jaata hai

Aks-e-deewar ke badalte hi

Khon sa lag gaya hai hathoN mein

ChaRh gaya zehr, gul masalte hi

Comments